لحن

يا آخر صفحة فى الكراس
خلاص قلمى انكسر سنه
فموش هاكتب
على سطورك
بقايا حلمى وجنونه
ونص قصيده منسية ..
ولو قلبى مهوش عاصم
مانيش راسم
سفينة نوح
توصلنى
لحد نهاية المرسى
ولا هانسى
خطاوى ناسجة مشوارى
ولا هدارى
سوى جثة
شايلها سنين على كتافى
وليه ياصفحه
بتخافى ؟!
غراب البين ماعلمنى
مراسم دفن وجنازة
ما مات منى
لكنه ساب كلام ..
مرمى بلون ريشه
عملت منه تعويذة
فتحت القوس اغنيها
قفلى القوس وخلانى
أعيد الدايرة من تانى